Um størvini
Talan er um avloysarastørv í skiftandi vaktum allar dagar í viku. Starvsstaðurin er í Streymoy, Eysturoy, Norðoyggjum ella Suðuroy.
Arbeiðsuppgávur
Eindin veitir í høvuðsheitum tænastur til likamliga skerd vaksin, fólk við seinheilaskaða og demens. Talan er um sambýli, umlætting og dagtilboð og stuðul í heiminum.
Harumframt hevur eindin ábyrgd av øllum trivnaðartænastum í Suðuroy, t.e. sambýli, stuðul og dag- og umlættingartilboð á økjunum menningartarn, fjølbrek, likamligt brek, autisma og sosialpsykiatri.
Uppgávurnar eru ymiskar frá stað til stað, men felags fyri arbeiðið er, at tú hevur hug og hegni at fáast við menniskju, sum hava skerdan førleika. Talan kann vera um røktaruppgávur og ymiskar námsfrøðiligar uppgávur, har allar hava til endamáls at skapa ein góðan, gevandi og mennandi dag fyri tann einstaka.
Vit arbeiða eftir KRAP, sum er ein sosialnámsfrøðilig tilgongd, har vit tilvitað arbeiða viðurkennandi við relatiónum og út frá sterku síðunum hjá tí einstaka. Vit arbeiða bæði fyri at menna førleikar og halda verandi førleikar við líka.
Førleikar
Øll eru vælkomin at søkja, men vit ynskja fyrst og fremst avloysarar við útbúgving ella sum eru lesandi innan fakbólkarnar námsfrøðingur, sjúkrarøktarfrøðingur, heilsurøktari, heilsuhjálpari, ergoterapeutur, fysioterapeutur ella sosialráðgevi.
Væntanir
Vit vænta, at tú hevur eina jaliga menniskjafatan, og at tú fært fólkini at kenna seg vird, hoyrd og sædd. Tú ert tænastusinnað/-ur og vilt virka fyri, at tann einstaki verður settur í miðdepilin. Dentur verður lagdur á gott samstarv og áræði. Vit vænta okkum tolnar, fyrikomandi og hjálpsamar starvsfelagar, sum trívast í einum umskiftandi arbeiðsdegi.
Vit kunnu bjóða
- Eitt spennandi starv við fjølbroyttum uppgávum, við møguleika fyri fakligari og persónligari menning.
- Góða upplæring.
- Góðar arbeiðsumstøður, har dentur verður lagdur á trivna og fakligheit.
Barnaváttan
Vísandi til løgtingslóg um barnaváttanir § 4 stk. 3 hevur Almannaverkið skyldu til at útvega barnaváttan, áðrenn setanin verður framd.
Setanar- og lønarviðurskifti
Setanarøkið er Almannaverkið við tænastu í løtuni í Trivnaðardeplinum, Likamligt brek. Tann, ið verður sett/-ur, má tola broytingar í starvinum, og at hetta kann verða umskipað til eisini at fevna um aðrar uppgávur.
Tú verður lønt/-ur við tímaløn sambært einum av hesum sáttmálunum, sum Fíggjarmálaráðið hevur við: Føroya Pedagogfelag fyri námsfrøðingar, Føroya Pedagogfelag fyri hjálparfólk, Felagið Føroyskir Sjúkrarøktarfrøðingar, Heilsurøktarafelagið, Heilsuhjálparafelag Føroya, Ergoterapeutfelagið, Fysioterapeutfelag Føroya ella Starvsfelagið.
Umsókn
Tú søkir við at trýsta á grøna knøttin "Søk starvið".
Freist
Eingin umsóknarfreist er, og umsóknir verða viðgjørdar so hvørt, tær koma inn. Vit seta okkum í samband við teg í seinasta lagi ein mánað eftir, at umsóknin varð móttikin.
Nærri upplýsingar
Nærri upplýsingar fáast við at venda sær til Elina Danielsen, eindarleiðara, á tlf. 297400. Les meira um eindina Likamligt brek her.
Almannaverkið strembar eftir at gera mun við bestu og mest framkomnu sosialu tænastunum til Føroya fólk á øllum virkisøkjum stovnsins.
Almannaverkið umsitur fyri góðar 2 milliardir krónur á løgtingslógini fyri 2023, og til samans starvast meira enn 1200 fólk í Almannaverkinum.
Leiðslan í Almannaverkinum er skipað við almannastjóra, fíggjarstjóra, trivnaðarstjóra og viðskiftastjóra. Trivnaðardepilin umsitur allar trivnaðartænastur, og Viðskiftadepilin umsitur sosiala fyrisiting og útgjald av veitingum.
Almannaverkið virkar um allar Føroyar og veitir umleið 1000 trivnaðartænastur til góðar 750 borgarar, ið fáa tænastur á bústøðum, verkstøðum, dag- og frítíðartilboðum, umlættingartilboðum, stuðulstilboðum og barnavernd í fleiri enn 88 bygningum kring alt landið. Fleiri enn 20.000 hjálpartól eru lænt út at betra um lívið hjá borgarum og fleiri enn 950 borgarar fáa endur- og viðlíkahaldsvenjing fyri at vinna førleikan aftur. Hvørt ár gera vit 240.000 peningaflytingar og taka 16.300 avgerðir.
Endamálið hjá Almannaverkinum er at skapa tryggar lívsumstøður og eitt gott sjálvstøðugt lív. Hesum stremba starvsfólkini eftir at røkka við at gera mun við bestu og mest framkomnu sosialu tænastunum. Almannaverkið leggur dent á javnvirði, eldhuga, trivnað, gjøgnumskygni og yrkisdugnaskap í gerandisdegnum, og virðini skulu endurspeglast í øllum virki okkara.